"Danslagið seiðir
og götuna greiðir"

11.1.07

GLEÐILEGT NÝTT ÁR! ”Nú árið er liðið í aldanna skaut og aldrei það kemur til baka”, eins og segir í sálmi séra Valdimars Briem. Þetta finnst mér alltaf jafn merkilegt.

2006 var fínt ár að langflestu leiti, það dó að minnsta kosti enginn mér nákominn. Ég gerði samt ekkert stórfenglegt árið 2006, eignaðist hvorki barn, né gifti mig, né var sæmd fálkaorðu. En ég kláraði fyrsta eitt og hálfa árið í verkfræði og hönnun við Háskólann í Álaborg og er þar með hálfnuð með bachelorinn.

2006 var skemmtilegt ár. Í apríl ferðaðist ég um Ítalíu í 10 daga með bekknum, fór til Feneyja, Mílanó, Vizenca og kom við í Þýskalandi og Frakklandi. Í október lá leiðin til Berlínar og svo Reykjavíkur að fagna annarri mastersgráðu Kristins bróður.

Árið 2006 fékk ég fullt af góðum heimsóknum til Álaborgar. Kalli flugmaður, Tinna Ólafsdóttir, Skúli bróðir, Mamma, SandraogBenni, Nonni heimsflakkari og Biggiblogg. Sjöföld hamingja með að þið skylduð koma - takk!

Árið 2006 gerði ég tilraun til þess að uppfylla skandinavíska staðalímynd með ljósu hári.

Árið 2006 urðu stakkaskipti í samgöngum. Ég eignaðist hjól, Scandinavian design með körfu og öllu tilheyrandi. Lestin var þar með úr sögunni.

Sumarið 2006 leið hratt. Ögurball, Vicky í heimsókn, Ofurkonufótbolti, golf, Aðalvíkurferð, Mýrarbolti, Landsbankavinna, Sigur Rós tónleikar, ættarmót, kjallarapartý....

Jólin árið 2006 voru góð, eins og alltaf. Alveg frábær, ég er enn að jafna mig eftir gleðina og góða matinn.

2006 var gott. Takk fyrir mig.


2007 er gengið í garð með prófum, flutningi og janúarsudda. Fyrsta prófið gekk mjög vel. Það næsta er ekki fyrr en 25. janúar svo í millitíðinni ætla ég að nota tímann í að flytja og koma mér fyrir.
...sagði Hafdis Sunna klukkan 23:41