"Danslagið seiðir
og götuna greiðir"

20.10.05

Eins og glöggir lesendur vita þá brá ég mér til Gautaborgar og Glasgow á síðustu helgi í tilefni haustfrísins í skólanum og til þess að fullnægja Kristinsþörfinni. Líkt og við var að búast var helgin frábær og miklu meira en það. Allir voru í stuði, ég, Vicky, Kristinn og veðrið.

Ef Vicky tæki próf í gestrisni þá fengi hún eflaust 10 (eins og í öllu hinu). Hún er ótrúleg og manni líður alltaf eins og kóngi þegar maður er í heimsókn hjá henni, næstum vandræðalegt. Í stuttu máli þá bæjuðumst við, Vicky eldaði meiriháttar mat fyrir mig og svo horfðum við á sænska idolið, mjög skemmtilegt að fá óhlutlausan sjónvarpslýsanda, fékk þetta allt beint í æð. Alltaf gaman að koma til Svíþjóðar, alltaf gaman að hitta Vicky.

Kristinn er líka með gestrisnina í toppformi og fær auk þess fullt af prikum í hattinn fyrir ótrúlegt búðaþrek. En fyrir utan London þá hefur Glasgow flestu búðirnar í UK og er þekkt fyrir allar fjölmörgu skóbúðirnar. Krónan er sterk og hagstætt að versla. Ykkur undrar sennilega ekki að gömlu skórnir og fötin í fataskápnum hafi nú fengið skoskan og sænskan félagsskap. Annars gerðum við Kristinn aðeins meira en að versla, búðirnar loka jú klukkan fimm og þá þurftum við að finna okkur e-ð til dundurs. Djók. Fórum í nýtt og flott bíó sem er að minnsta kosti 12 hæða og með sölum á allavega 6 hæðum, bar og fleiri en einni sæligætis-, popp- og gossjoppu. Sáum frönsku Feneyjatvíæringsverðlaunamyndina Le Grand Voyage, það var eins og að horfa á grasið vaxa. Fórum líka út að borða og út að djamma með skólafélögum Kristins. En auk þessa þá fann Kristinn sig knúinn til þess að kenna mér að elda svo hann tók mig í kjúklinga- og nautakjötsréttsmatreiðslu (var þetta ekki annars nautakjöt?).
Skoskan er skondin, hafði ekki gert mér grein fyrir því að hún væri svona torskiljanleg, þrjú "ha" dugðu varla. Glasgow er skemmtileg borg og ekki skemmir fyrir að Kristinn býr akkúrat í miðbænum. Kem tvímælalaust aftur í heimsókn.

Myndir frá Gautaborg fyrir neðan og myndir frá Glasgow fyrir ofan. Okei, segir sér kannski sjálft, en...
...sagði Hafdis Sunna klukkan 18:25